فى طريقيتين
نبتدى بالطريقة البطيئة: انك تعرض المنتجات اللى بيعرضها تاجر الجملة...وبعدين تبتدى تجمع اللى يتطلب منك وتشتريه من تاجر الجملة..الطريقة دى مكسبها قليل ومتعبة جدا لانك لازم تكون على تواصل جيد ما بين زباينك ومابين تاجر الجملة ولو التاجر دة اسعاره قليلة مقارنة بباقى التجار فطبيعى انك هتلاقى اللى انت طلبته خلص وممكن تلحق منه حاجات وحاجات لاء..فهتضطر تروح لتاجر تانى اسعاره اعلى لان البضاعة عندة متوفرة بس بسعر اغلى للاسف..ودة هيأثر عليك لانك هتبيع بسعر اغلى ومش هتعمل زبون وسمعة زى ماكنت بتخطط..بس لازم نعترف ان الطريقة دى نسبة مخاطرتها قليلة لان كل اللى اشتريته انت بيعته للناس اللى طلباه مسبقا..ودة ما يمنعش انها طريقة مكسبها قليل جدا وبطيئة مقارنة بالطريقة التانية
الطريقة التانية: خليك محترف واعمل نفسك كأنك معرض او محل..وما تستناش لما البضاعة تتطلب منك الاول..لاء انت هتشترى البضاعة الاول وبعدين تعرضها...هتقولى بس كدة هدفع كتير وممكن الحاجة ماتتباعش...هقولك انت مش محتاج تشترى غير 3 الوان من كل موديل وتكون الوان مميزة على حسب الموسم وعلى حسب الفصل اللى احنا فيه صيف,شتا..الخ
يعنى مثلا تشترى اسود كشمير نبيتى من خمس موديلات مثلا..والالوان دى كمثال عشان ماتفهمش غلط..فى متوسط سعر الشنطة 50 جنيه مثلا..فحضرتك عملت فاتورة بحوالى 700 جنيه..ودة مش رقم لو عايز تشترى جملة وتبتدى تكبر شغلك..وطبعا باحتكاكك بالزباين وكتر التعامل هتبتدى تكسب خبرة تشترى ايه امتى..وبكدة تكون الحاجة متاحة تحت ايدك وربنا يكرمك وتبيعها فى يومين تلاتة ولو حاجة فضلت معاك تقدر تبيعها بتمن اقل او بنفس التمن اللى اشتريته بيها..وتطلب تانى اسرع من غير ما تتضيع وقت ومجهود وتليفونات مع الزباين ومع التاجر..وهتلاقى نفسك بتعمل3اوردرات فى الاسبوع بدل ما بتعمل اوردر كل اسبوعين...يعنى هتكسب قد اللى كنت هتكسبه بالطريقة البطيئة 6 مرات...وماتنساش ان الطريقة دى هى اصل التجارة...واجتهد وخلى رزقك على الله سبحانه وتعالى.
